cantilangnon ini a blog of a cantilangnon, in cantilan, surigao del sur, philippines Statistics Unique Visitors: Total Unique Visitors: Outgoing: Total Outgoing: 10 0 57 4078

Articles from cantilangnon ini

Miaging Semana 2007-09-19 19:22:00 Marajaw na adlaw sa ijo hurot!Kumusta naman?  Pasensya gajud kuman pa nak ma-update an blog, nagbinuang man gud an network nan ini na blog service (i.ph), di ak makasuyod sa blog, isahay ma-access pero arang kahinay.  Bagan kuman pa nag-arang-arang an connection.  Ugsa lastweek, naningkamot rakan ako pangampanya para sa Filipino Blog of the Week (#73).  Kalooy sa Dios, nakadaug intawon (tan-awa an badge sa sidebar hehehe).  Salamat matud sa suporta.Ak rakan sumadahon an mga panhitabo nan miaging mga adlaw, pinaagi sa mga retrato sa ubos, sanan gamay na pamatbat. hehehe Nan isa na adlaw, panyange ko, nakapalit ak banisel, gikan sa Langcogue kuno adto.  Nakahuna-huna dajon ak na bagan kalami gat-an.  Deretso dajon ak palit nijog, sa may kilid balitaw nan tyangehan, tagpakagud, tagkuha an gata.  Tagluto ko dajon na binutangan nan silikot (taas na sili).  Na lami-lami na, tanhuyasan sinopsop sanan hinigop nan sabaw.  Human panihapon ...

Ayok, ato kaw? 2007-09-13 20:55:00 Kit-an ko ra sa youtube ini, kyut, lingaw karajaw.  Tangutana an bata unoy ija himuon kon jaoy "mumu".  Iplay, panalinga. hehehe[video align="align-center"]http://www.youtube.com/watch?v=M60WzRiNPGw[/video]((iplay lam, kun di moplay pinduta ini) Kon isahay magsamok, o magbinagis an at bata, hadlukon dajon nat nan misan uno rakan, ma mumu, o wakwak, maghunong na dajon.  Pero lahi ini na bata sa video, ija man kuno sipaon sa lubot an mumu. hehehe ...

Nanibong 2007-09-09 16:55:00 Noches dijo!Nan isa na adlaw nakadawat kami nan imbitasyon sa kasal nan silingan nam.  Alas dos kahapon an kasal nan bata nila mano Urbano sanan mana Marlyn Maratas, didto an kaon sa Solar Lodge, sa baybay.  Inday diin mahibutang an imbitasyon, kalimtan nam an oras, ugsa ya kami kaatend sa simbahan, deretso rakan kami sa reception.  Amora jaon pamatbaton sa pangadji balitaw na "ini kami sa katapusan ya kami sa sinugdanan". hehehe  Nakay pag-abot nam sa Solar, daboay na sab naghuyat daan sa kinasal, pareha ra sab siguro sa am, ya mangadto sa simbahan.  Ugsa dili ra tanto sipog.  hehehe  Aja ra kataud-taud noabot an kinasal.  Daya nak an digicam, piktyur-piktyur rakan anay ako samtang may pa mga siremunyas.  Sa ubos mga retrato.Adisir nanuyod, tag-utod anay an ribbon, human tagsudlay an yaki, tapos tagpainum nan tubig na may dahon nan kalipajan an kinasal.  An mga ninong, ninang naghuyat mahuman an siremunyas. Mga silingan nan y ...

Ato Danao 2007-09-05 20:18:00  (Ak ipost jari balak na taghimo ni Zandro, ganing sab.  Jaon retrato matud sa Lin-aw nan Danao.)Danao, Danao, Danao hain na kaw?(ni Zandro Urbiztondo)mataghom na kabuntagon, sa Danao natiponpagsinghot modugang, nan kinabuhi na dajontubig na sagol, nan tab-ang… mataghompakat na tagtunga, gikan sa baybajonpagkaon na imo, taghatag matam-issa una mga isda, waya may pagnipissa kada pagkadto, puno an barotohangtud na nalunod, tungod sa mga tawohinungdan, hinungdan hamok na hinungdanbaja an tinood kami tag-ilogantagsakmit kaw damo, daya an insultotungod lagi kay sila gobyerno…ikaw tag buhi-an, tagdawat an hinungdanhinaut malipay kaw sa kadaghanandi tana ma-utro pa an kasamokkay kon mahitabo, ija-ija motamoksa tanan na nalipay tungod sa hinungdansa tubig nan Danao nahisuyat an tanantungod permanente an agas yay paghunongtanan yay kasigurohan, ugsa perme pamalandong... ...

Sa plaza 2007-09-03 18:25:00 Kaina, gikan nak sa munisipyo, noagi ak sa plaza.  Retratohan ko an mga bata, arang kabibo nag duwa.  Jaoy ila bag-o na duwa, amora "tok-tok palatok..." pero tinagalog.  An retrato sa ubos.  Amo ini an "lyrics", "Sili...sili maanghang,Tubig...tubig malamig,Si Ale ang taya."Kantahon jaon, tapos magpili nan entra kada "syllable" nan sulti, kon sinoy kahunongan nan katapusan sa kanta, ya nay apil sa pagpili, an mabilin amoy mandakopay.  Moapil tana ako, yak paentraha kay paspas kuno ak modjagan.  Kaganing lam mobalik pagkabata, yay mga problema na pagsulbaron.   ...

Garboso Cantilangnon! 2007-09-01 13:17:00 Yak mahibayo unhon nak pagsugod, unoy ak premiro isuyat....(*huna-huna anay*) Balitaw, yak makatingog pagkahibayo ko na akoy nakadaug nan Filipino Blog of the Week (#71) ni Rick (tagtawag sab na talksmart / the composed gentleman).  Sa kalipay siguro, ugsa.  At last nakadaug ra gajud.  Ini na blog siguro an pinakauna na nakadaug, na dili kon eninglis, tinagalog sanan binisaja, nagpamatud-an na yay pili, misan sin-o makablog.  Ugsa yay hunong nak pasalamat sa tanan noboto sanan sa nobisita, inday unhon nak pagbayos sa ijo.  Ini blog o ini award rakan siguro amoy ak regalo.  Ikatuyo naman ini blog nanominate, sugod nan Week #69, adiser nakadaug.  Hangtud kuman Week #72, naapil gihapon sa botohan.  Ugsa, ipadajon gihapon an ijo suporta pagboto, amo?Salamat sab matud kan talksmart, an nagpalujo nan jaon na award.  Misan dili eninglis, tinagalog o binisaja, tagnominate gihapon ini blog.  Pinoy jaon sija, jadto na sa South Dakota, USA maghuy ...

Kabibo lam 2007-09-01 08:46:00 Happy Fiesta baja kuman sa Consuelo, pista dijo!Kahapon taghagad ak nan SSPSC-SSIT administration employees nan paniudto, kay nag-"hataw" sila sanan nagcoastal cleanup sa Consuelo.  Human kintahay nan mga aktibidadis, naniudto sanan nagvideotres dajon nagpahilis nan tagkaon. hehehe  Lingaw karajaw, sa ubos mga retrato.(nagkilaw nan nukos, paresan dajon nan kamote sanan saging) (Nagpili si pare Tata nan kantahon; tagkantahan ni mana Virginia; sajawan nila)Kabibo lam!  ...

bakunawa, ibalik an buyan! 2007-08-28 07:38:00 Tagkaon baja nan bakunawa an buyan kaina amo?  Ya may gud ak hindungan nagtambor nan lata, nagsinggit na ibalik na an buyan.  Inday kon nahinumduman pa nan iban jaon na istorya sa bakunawa, sa una pa man sab jadto?Balitaw sa ya mahibayo, may "total lunar eclipse" kaina.  Mahitabo baja jaon kon an kalibutan napatungaan nan suga sanan buyan na an landong nan kalibutan adto singod sa buyan.  Pero di lam magkabiro kon ya kakita kay an sunod na eclipse mahitabo sa Pebrero 21, sunod tuig.Kaina, amora sab hino gajud taglamon an buyan nan dako na binuhat, nan bakunawa.  Di man gud karajaw madag-om dire, sanan buyanon sab, ugsa makita gajud an pag-eclipse.  Jaoy ak mga nakuha sa camera, nakay gamay raman an megapixels (MP) di kon klaro, ugsa hanap rakan ak nan retrato sa internet. heheheKaganing lam unta kon may magsuyat nan leteratora, mga tinuhoan sanan iban pa, nan at lungsod, para unta sa at mga anak sanan sa ila sab mga anak.  Na di kon parehas ...

Hala kalisto! 2007-08-23 20:52:00 Nakadumdom pa kamo sa una nan ya pay kuryente (surseco), basta duyom na gani magduwa dajon an mga bata nan landong nan alima ipaatubang sa lampara/muron, magporma nan misan uno rakan, hampan himuan nan istorya?  Amora sab nan sine, lingaw karajaw ak jaon sa una.  Misan gani kuman, kon magbrown-out, lingawon ko si Linvs (am bata) nan jaon. [video align="align-center"]http://youtube.com/watch?v=UCn3mYR97YM[/video](iplay lam, kun di moplay pinduta ini) Pagsuroy-suroy ko kaina, nakit-an ko ini na video, ak lam i-share, amo?  Si Raymond Crowe matod jaon sa video, taga-Australia.  Grabe kalisto!   Enjoy! ...

Tininguha na mga Botang* 2007-08-22 20:34:00 (* Taghubad sa balak na "Desiderata" , copyrighted nan 1927 ni Max Ehrmann.  Nagbasi sab ako sa hinubad ngadto Sinugboanon ni Omar Khalid.  Jaoy iban na mga sulti na ya ak kahibayo nan Cantelangnon, sanan an iban siguro mga "literal" ra pagkahubad, pakicomment rakan kon unoy ganing ipuli.  Salamat) Padajon sa panaw bisan pa sa kasaba sanan kapaspas sa panahonsanan hinumdomi uno an kalinaw didon sa kahilom.Kutob sa mahimo ajaw pagtalawMagmabinatiun kaw sa tanan tawo.Isulti an imo mga kamatuodan sa hilom sanan sa katin-aw,sanan panalinga sa iban,kay misan an ngangoy sanan an ignorante,sila sab, jaoy mga kaugalingon na istorya.Likaje an mga borara sanan mga mapahitas-on na tawo,kay sila makasamad sa kayag.Kon ipareho mo an kaugalingon sa iban,ma yay puyos ra kaw sanan masakitan;kay sa tanan higajon jaoy labaw sanan ubos pa sa imo.Pahemosli an imo mga kalambuan sanan mga plano.Tutoki an kaugalingong mga tinguha, pero magpaubos.isa ini ka tinuod na ba ...

Gera-gera 2007-08-19 09:33:00  Nan miaging pista, punto kadabo na paliton,  mabaro, sapatos, bra, taperwer, mga taring-taring sa kalawasan sanan misan uno rakan na duwaan.  Isa ka duwaan an grabe ka halin, an dibala na pusil-pusil.  Ugsa kon mosuroy kaw sa lungsod, halos tanan bata jaoy daya nan ini, amora hain mosulong nan gera. hehehe Parepareha ra gajud sa tinuod jaon na mga duwaan, may "shotgun', ".45" sanan "uzi".   Mahinumdom dajon ak sa una, nan pareha pak sa ila, lain man na pusil-pusil am daya-daya.  Hinimo man sa kahoy, yay bala.  Sanan kwan sab, kajawan na pabut-unon, mag-gera-gera dajon, taga-Embarcadero kontra taga-Tampak. hehehe  Arang kabibo kay maglanat-lanat dajon sa tunga nan dayan, jadtoy nan haja kay nangaigo nan binasa na papel na bala, sanan bala na nijog.  Pero mas delikado siguro jaon kuman, kay an bala nan jaon ila pusil-pusil (pellet gun?), plastik na lingin, sakit karajaw makaigo.  Ugsa ya balitaw nak paliti s ...

Tagay* 2007-08-18 21:00:00 (Generoso Brandy kuman an uso na imnunon dire sa Cantilan.....kampai!) (*by Zandro Urbiztondo)Uno man na kalisod sabton an at kinabuhi Uno man na an kalipay mo-agi ra man kadali Jaon pay tagkinahanglan na waya pa mo-abot Jaon pay mga tinguha na waya pa makab-ot Koros uno: Ugsa pirmi an tagay, permanente bayong Ugsa pirmi yay angay, kay di na man masabot Ugsa pirmi an tagay, kay dili na ma-angot Magkabuntag molutay, permanente bayong Kahamok na pangutana, na kalisod tubagon Kahamok na mga suba, na malisod langojon Tig-a sa pagkakuman, di magdugay ma-utod Sugton sa pagka-kuman, buyugan da sa sunod Utro koros uno: Karajaw na na trabaho, ya gihapon makontento Inday unoy taghanap dako na man unta an sweldo Jaoy kuyang, jaoy kuyang, jaoy kuyang, jaoy kuyang Koros dos: Ugsa pirmi an tagay, permanente bayong Ugsa pirmi mag-away, kay di na masabot Ugsa pirmi an tagay, kay dili na ma-angot Bahala na mangamatay.. Permanente bayong…bayong… (iclick an numero 5 sa "Ma ...

Libre 2007-08-17 07:47:00 Laong pa nila an mga Pinoy kuno mga "freebie suckers", hanguy nan mga libre.  An at mga talinga permi nagbantay kun hain an libre mapakaon man o mabutang.  Nakay kun taghagad isab, diba?  O di kaha may mga offers.  Pero panyagsa kita sab anay mohatag. heheheSa Internet man gud, punto kadabo na mga libre.  Nan miaging buyan, pagsurf-surf nak sa internet naabot ak sa ini na site, Project Gutenberg.  Ini sija na project, primero sanan pinakadako na koleksyon nan "electronic books" o "eBooks" sa internet.  Kay ini hilig man ta lagi  magbasa-basa nan misan uno rakan, may ak tagpil-apan na form.  Para sa libre man kuno jadto na CD/DVD.  Pila ka adlaw milabay, nan Huwebes nakadawat ak nan registered mail, magdaya kuno ak nan P35.00, inday para sa hain kaha jadto.  Pagkadto ko sa Post Office, kadumdom ak na sa jadto baja ak tag-aplajan.  Tagview ko dajon an CD/DVD, madabo na eBooks kintahay an suyod, kump ...

Nan Pista 2007-08-16 10:05:00 Diba jaoy paningunon na "A picture paints a thousand words", amo?  Mga retrato ra lam anay nan pista ak ipamutang kuman kay jaopay ak "hangover". hehehe  Aw butangan ko lam nan gagmay na sulti.   (An program nan Fiesta Celebration sanan si Linvs tan-aw nan parade)  (Si Mrs, Linvs sanan si BB, sa likod an mga kandidata para sa "Pagwapahay sa Cantilan 2007".  Sayang lam kay yak makakita nan pagpageant, duyom nan pista.  Pagkahuman gajud nan parade nag-uyan man, may dajon rainbow.) (An rainbow imabaw sa at simbahan; may fireworks pagkaduyom nan desperas.)   (An chess tournament sanan an ukay-ukay sa may tiangehan, kuman hinay-hinay na bukyas nan mga tinda.) (An mga baboy na ihawunon sa slaughter house sanan an am handa)An sobra na pagkaon kahapon, gulay-gulajan rakan nam kay di kaw, an high-blood, diabetes, athritis sanan uno pa. hehehe  Sige, dinhi rakan anay kutob ak tabi, balik-balik ra ta ...

Kapungot gajud! 2007-08-15 05:41:00 Ay-ay porbida man gajud ini SmartBro, ajara kahuman gajud an parade nan lunes petsa trese, pagkaduyom nag-offline an internet.  Ak tana ipan-upload an mga retrato kuha nak nan pagkahapon, pagparade.  Tagtawagan ko an ila technical support an laung, di lam kuno magkabiro kay mobalik ra.  Na unoy balik didon na kaina naman mga alas 10:30 nan buntag mibalik. Sige rakan lam kay at least nobalik raman.  Marajaw na pista sa tanan, sanan sa taga SmartBro.  Di na tana mag-offline!  ...